सोलापूर : सोलापूर सोशल प्रायमरी स्कूलच्या वतीने सोलापूर येथील उर्दू घर येथे विद्यार्थ्यांसाठी विशेष कार्यक्रमाचे आयोजन करण्यात आले. उर्दू भाषेची गोडी, साहित्यिक परंपरा आणि भाषेचे महत्त्व विद्यार्थ्यांना समजावे, तसेच उर्दू भाषिकांविषयी आदराची भावना निर्माण व्हावी,या उद्देशाने विविध उपक्रम घेण्यात आले.
या कार्यक्रमादरम्यान विद्यार्थ्यांनी उर्दू भाषेशी संबंधित विविध विषयांवर आधारित कार्यक्रम सादर केले. शेर-ओ-शायरी, भाषण,काव्यवाचन तसेच विविध सांस्कृतिक सादरीकरणांमधून उर्दू भाषेचे सौंदर्य आणि समृद्ध साहित्यिक परंपरा विद्यार्थ्यांनी प्रभावीपणे मांडली. विद्यार्थ्यांच्या उत्स्फूर्त सहभागामुळे कार्यक्रमाला विशेष रंगत आली.
उर्दू ही केवळ संवादाची भाषा नसून तिच्यामध्ये साहित्य, संस्कृती,इतिहास आणि सामाजिक सलोख्याची समृद्ध परंपरा आहे. या कार्यक्रमाच्या माध्यमातून विद्यार्थ्यांच्या मनात उर्दू विषयाबद्दल आवड,आत्मीयता आणि अभिमानाची भावना निर्माण करण्याचा प्रयत्न करण्यात आला. तसेच उर्दू भाषिकांचा सन्मान आणि सर्व भाषांचा आदर करण्याचा संदेशही देण्यात आला.
कार्यक्रमाच्या यशस्वी आयोजनासाठी सोलापूर सोशल प्रायमरी स्कूलचे मुख्याध्यापक डॉ.आसिफ इक्बाल तसेच शाळेतील शिक्षकांनी अथक परिश्रम घेतले. विद्यार्थ्यांना मार्गदर्शन करण्यापासून ते विविध कार्यक्रमांची तयारी करून घेण्यापर्यंत शिक्षकांनी घेतलेल्या मेहनतीचे उपस्थितांनी कौतुक केले.
विद्यार्थ्यांच्या कलागुणांना व्यासपीठ उपलब्ध करून देतानाच भाषा आणि संस्कृतीविषयी प्रेम निर्माण करणारा हा उपक्रम प्रेरणादायी ठरला. कार्यक्रमाच्या शेवटी विद्यार्थ्यांनी आणि शिक्षकांनी उर्दू भाषेच्या संवर्धनासह सर्व भाषांचा सन्मान करण्याचा संदेश दिला.
