सोलापूर : सोलापूर महानगरपालिकेच्या मालकीच्या गाळ्यांबाबत महत्त्वपूर्ण निर्णय घेण्यात आला असून, गाळेधारकांनी गाळे पोटभाड्याने (सबलेट) देण्यावर स्पष्ट बंदी घालण्यात आली आहे. या संदर्भात महानगरपालिका आयुक्तांनी कडक फर्मान जारी केले असून,नियमांचे उल्लंघन करणाऱ्यांवर कारवाईचा इशारा देण्यात आला आहे.
महानगरपालिकेच्या गाळ्यांचा मूळ उद्देश संबंधित धारकांनी स्वतः व्यवसाय करावा हा आहे. मात्र,गेल्या काही वर्षांत अनेक गाळेधारकांनी नियमांना हरताळ फासत गाळे इतरांना पोटभाड्याने दिल्याच्या तक्रारी प्रशासनाकडे वारंवार येत होत्या. त्यामुळे महसूल तोटा आणि अनियमितता वाढत असल्याचे निदर्शनास आले आहे.
या पार्श्वभूमीवर आयुक्तांनी सर्व गाळेधारकांना नोटीस देत स्पष्ट केले आहे की,कोणत्याही परिस्थितीत गाळे पोटभाड्याने देणे बेकायदेशीर ठरेल. संबंधितांनी स्वतः व्यवसाय न करता गाळे इतरांकडे दिले असल्यास तात्काळ स्थिती सुधारावी,अन्यथा गाळे जप्त करण्याची कारवाई केली जाईल.
महानगरपालिकेकडून लवकरच विशेष पथकांच्या माध्यमातून गाळ्यांची तपासणी मोहीम राबविण्यात येणार आहे. या मोहिमेत पोटभाडे देण्यात आलेले गाळे,नियमबाह्य वापर, तसेच थकीत भाडे यांची सखोल चौकशी केली जाणार आहे.
दरम्यान,या निर्णयामुळे प्रामाणिकपणे व्यवसाय करणाऱ्या गाळेधारकांना दिलासा मिळणार असून,बेकायदेशीर व्यवहारांना आळा बसेल,असा विश्वास प्रशासनाने व्यक्त केला आहे. मात्र,काही गाळेधारकांकडून या निर्णयाबाबत नाराजीही व्यक्त होत असल्याचे समोर येत आहे. महानगरपालिकेच्या या कडक भूमिकेमुळे आगामी काळात गाळ्यांच्या वापरात शिस्त येईल का,हे पाहणे महत्त्वाचे ठरणार आहे.
