सोलापूर जिल्ह्यातील शेतकऱ्यांचे सरकारकडे लक्ष
सोलापूर : राज्याचे अर्थसंकल्प अधिवेशन सुरू असताना सोलापूर जिल्ह्यातील शेतकऱ्यांचे लक्ष सरकारच्या निर्णयाकडे लागले आहे. गेल्या काही महिन्यांत अवकाळी पाऊस,गारपीट व इतर नैसर्गिक आपत्तींमुळे अनेक पिकांचे मोठ्या प्रमाणात नुकसान झाले आहे. त्यामुळे पिक विमा भरलेल्या तसेच नैसर्गिक आपत्तीमुळे नुकसान झालेल्या शेतकऱ्यांना या अर्थसंकल्पात न्याय मिळणार का,असा प्रश्न शेतकऱ्यांमध्ये उपस्थित होत आहे.
सोलापूर शहरासह संपूर्ण जिल्ह्यात खरीप आणि रब्बी हंगामातील पिकांचे मोठे नुकसान झाले होते. विशेषतः ज्वारी,हरभरा,गहू,डाळी आणि भाजीपाला पिकांवर अवकाळी पावसाचा मोठा परिणाम झाला. अनेक शेतकऱ्यांनी शासनाच्या पिक विमा योजनेअंतर्गत विमा भरला असला तरी अद्याप नुकसान भरपाई मिळालेली नसल्याची तक्रार शेतकरी करत आहेत.
या पार्श्वभूमीवर सुरू असलेल्या अर्थसंकल्प अधिवेशनात शेतकऱ्यांच्या प्रश्नांकडे सरकारने गांभीर्याने लक्ष द्यावे,अशी मागणी होत आहे. जिल्ह्यातील शेतकऱ्यांना नुकसान भरपाई जाहीर करून ती लवकरात लवकर त्यांच्या खात्यात जमा करण्यात यावी,अशी अपेक्षा व्यक्त केली जात आहे. सोलापूर जिल्ह्यातील अनेक भागांत पंचनामे करण्यात आले असले तरी प्रत्यक्षात नुकसान भरपाई मिळण्यात विलंब होत असल्याचे शेतकऱ्यांचे म्हणणे आहे.
त्यामुळे या अर्थसंकल्पात शेतकऱ्यांसाठी विशेष तरतूद करून पिक विमा व नैसर्गिक आपत्तीमुळे नुकसान झालेल्या पिकांची भरपाई जाहीर करावी,अशी मागणी वाढत आहे.
दरम्यान,शेतकरी संघटना व स्थानिक लोकप्रतिनिधींनीही सरकारकडे सोलापूर जिल्ह्यातील नुकसानग्रस्त शेतकऱ्यांना तातडीने मदत देण्याची मागणी केली आहे. अर्थसंकल्प अधिवेशनात याबाबत ठोस निर्णय झाल्यास सोलापूर जिल्ह्यातील हजारो शेतकऱ्यांना मोठा दिलासा मिळणार आहे.
सध्या शेतकऱ्यांचे लक्ष सरकारच्या अर्थसंकल्पीय घोषणांकडे लागले असून नुकसान भरपाईबाबत सरकार काय निर्णय घेते, याकडे संपूर्ण जिल्ह्याचे लक्ष लागले आहे.
