मुंबई : आगामी राज्यसभा निवडणुकीच्या पार्श्वभूमीवर आज राष्ट्रवादी काँग्रेस पक्षाच्या उमेदवाराने अधिकृतपणे उमेदवारी अर्ज दाखल केला. यावेळी पक्षातील ज्येष्ठ नेते, पदाधिकारी आणि कार्यकर्त्यांनी व्यक्त केलेल्या विश्वासाबद्दल त्यांनी मनापासून आभार व्यक्त केले.
उमेदवारी अर्ज दाखल केल्यानंतर बोलताना त्यांनी सांगितले की,हा क्षण केवळ राजकीय प्रवासातील एक टप्पा नसून मोठ्या जबाबदारीची जाणीव करून देणारा आहे. पक्षातील सर्वांनी दाखवलेला विश्वास हा प्रेरणादायी असून तो अधिक जबाबदारीने काम करण्यासाठी बळ देणारा असल्याचे त्यांनी नमूद केले.
यावेळी त्यांनी आपल्या वडिलांचा उल्लेख करत सांगितले की,राज्याचे माजी उपमुख्यमंत्री अजित पवार यांनी आयुष्यभर जनतेच्या सेवेला प्राधान्य देत विकासाभिमुख राजकारणाचा आदर्श घालून दिला. त्यांच्या कार्यातून मिळालेली प्रेरणा आणि त्यांनी दिलेले संस्कार हेच पुढील वाटचालीसाठी मार्गदर्शक ठरणार असल्याचे त्यांनी सांगितले. तसेच,जनतेशी असलेली नाळ जपणे,प्रामाणिकपणे काम करणे आणि महाराष्ट्राच्या प्रगती व विकासासाठी सातत्याने प्रयत्न करणे ही मूल्ये पुढे नेण्याचा आपण प्रामाणिक प्रयत्न करू,असेही त्यांनी स्पष्ट केले.
जनतेच्या अपेक्षा,कार्यकर्त्यांचा विश्वास आणि पक्षाची विचारधारा यांना न्याय देत देश व राज्यातील महत्त्वाचे प्रश्न प्रभावीपणे पार्लमेंट ऑफ इंडिया मध्ये मांडण्यासाठी आपण कटिबद्ध राहू,अशी ग्वाहीही त्यांनी यावेळी दिली. राज्यसभा निवडणुकीच्या पार्श्वभूमीवर उमेदवारी अर्ज दाखल झाल्यामुळे राज्याच्या राजकारणात नव्या चर्चांना सुरुवात झाली असून पुढील घडामोडींवर सर्वांचे लक्ष लागले आहे.
