सोलापूर : दि.२१ (प्रतिनिधी) जिल्ह्यातील माढा तालुक्यातून सार्वजनिक खाजगी भागीदारी तत्वावर सधन कुक्कुट विकास गटाची स्थापना करणे या योजनेसाठी जिल्हा पशुसंवर्धन उपआयुक्त, सोलापूर कार्यालयामार्फत सन 2022-23 करिता योजना राबविण्यासाठी सन 2017-18 अतंर्गत 50 टक्के अनुदानावर पशुपालक लाभार्थ्यांची सर्व प्रवर्गातून लाभार्थी निवड करण्यात येणार आहे.
सर्व प्रवर्गातील लाभार्थ्यांना शासनाचे 50 टक्के अनुदान एकदाच देय आहे. एकूण प्रकल्प किंमत रु.1027500/- पैकी सर्व प्रवर्गातील लाभार्थ्यांना 50 टक्के अनुदान म्हणजेच रु.513750/- शासनाचे अनुदान देय असून उर्वरित 50 टक्के रक्कम लाभार्थी स्वत:चा हिस्सा किंवा वित्तीय संस्थेकडून कर्ज घेऊन उभा करु शकतील.
इच्छुक लाभार्थींनी संबंधित पंचायत समिती येथील पशुधन विकास अधिकारी (वि.)/लगतच्या तालुका लघुपशुवैद्यकीय सर्वचिकित्सालय/पशुवैद्यकीय दवाखाना श्रेणी-1/2 यांच्याशी संपर्क साधून विहीत अर्जाचा नमुना प्राप्त करुन घेऊन परिपूर्ण अर्ज संबंधित पंचायत समितीमध्ये पशुधन विकास अधिकारी (विस्तार), पंचायत समिती कुर्डूवाडी यांच्याकडे 2 सप्टेंबर 2022 अखेर सादर करुन योजनेचा लाभ घ्यावा, असे आवाहन जिल्हा पशुसंवर्धन उपआयुक्त डॉ. एन.ए.सोनवणे यांनी केले आहे.
