शेतकरी नेते राकेश टिकैत यांच्यावर मुजफ्फरनगर येथे जनआक्रोश रॅलीदरम्यान झालेल्या पूर्वनियोजित हल्ल्याचा राष्ट्रीय किसानी मंच (महाराष्ट्र) (जनआंदोलनांचा राष्ट्रीय समन्वय) आणि सर्वोदय मंडळ तीव्र निषेध करत आहे.
हल्लेखोरांना त्वरित अटक करण्याची मागणी
राष्ट्रीय किसानी मंच (जनआंदोलनांचा राष्ट्रीय समन्वय) भारतीय किसान युनियनचे राष्ट्रीय प्रवक्ते,संयुक्त किसान मोर्चाचे प्रमुख नेते राकेश टिकैत यांच्यावर आज दिनांक २ मे २०२५ रोजी मुजफ्फरनगर येथे झालेल्या भ्याड आणि पूर्वनियोजित हल्ल्याचा तीव्र निषेध करत आहे. टिकैत पहलगामच्या मुद्द्यावरून एका आक्रोश रॅलीला संबोधित करण्यासाठी आले असताना हा हल्ला झाला.
या घटनेमुळे देशभरातील शेतकऱ्यांमध्ये तीव्र संताप निर्माण झाला आहे,जे याला शेतकरी आंदोलनावरील थेट हल्ला मानत आहेत.
राकेश टिकैत यांनी स्वतः या हल्ल्याला पूर्वनियोजित असल्याचे सांगून प्रशिक्षित लोकांना दारू पाजून त्यांची हत्या करण्याच्या उद्देशाने पाठवले होते,असे स्पष्ट केले. अशा कृत्यांमुळे त्यांचा जीवही जाऊ शकला असता,असेही ते म्हणाले. तरीही, ते दृढपणे म्हणाले की, "शेतकऱ्यांच्या ताकदीवर ते आंदोलन अधिक मजबूत करतील."
हा हल्ला केवळ टिकैत यांच्या वैयक्तिक सुरक्षिततेवरच नव्हे, तर शेतकरी आंदोलन आणि लोकशाही मूल्यांवरही एक पूर्वनियोजित आघात आहे.
राकेश टिकैत हे शेतकरी नेते महेंद्रसिंह टिकैत यांचा वारसा पुढे चालवत अनेक वर्षांपासून शेतकऱ्यांच्या हक्कांसाठी लढत आहेत. त्यांचा आवाज दाबण्यासाठी अशा प्रकारचे हथकंडे वापरणे निंदनीय आहे. त्यांच्यावर हल्ला होण्याची ही पहिलीच वेळ नाही. यापूर्वी,२ एप्रिल २०२१ रोजी राजस्थानमधील अलवर येथे त्यांच्या ताफ्यावर हल्ला झाला होता, ज्यात त्यांच्या गाडीच्या काचा फोडण्यात आल्या होत्या. याशिवाय, ३० मे २०२२ रोजी बंगळूरु येथे एका पत्रकार परिषदेदरम्यान त्यांच्यावर शाई फेकण्यात आली आणि माईकद्वारे हल्ला करण्यात आला होता. या हल्ल्यांवरून स्पष्ट होते की टिकैत यांना वारंवार लक्ष्य केले जात आहे आणि त्यांचे मनोधैर्य खच्ची करण्याचा प्रयत्न केला जात आहे.
या हल्ल्याबाबत शेतकरी संघटनांची कठोर भूमिका
"शेतकऱ्यांना किमान आधारभूत किंमतीची (एमएसपी) कायदेशीर हमी मिळवून देणे,कर्जमुक्ती करणे आणि भूमी अधिग्रहणावर बंदी घालण्याचा आमचा संघर्ष सुरूच राहील. हल्ल्यांमुळे शेतकरी नेते घाबरणारे नाहीत. शेतकऱ्यांवर अनेकवेळा गोळ्या चालल्या,तरीही शेतकरी डगमगला नाही. अशा हल्ल्यांना आम्ही घाबरणार नाही." शेतकरी आंदोलन एकजूट आणि दृढ निश्चयाने पुढे जाईल.
घटनास्थळी हल्लेखोरांना त्वरित अटक न करणे हे स्पष्टपणे दर्शवते की हल्लेखोरांना सत्ताधारी पक्ष आणि स्थानिक पोलीस प्रशासनाचे संरक्षण मिळत आहे. राष्ट्रीय किसानी मंच या हल्ल्याला शेतकरी आंदोलनाला कमजोर करण्याचे षड्यंत्र मानते,जे अशा शक्तींनी प्रायोजित केले आहे ज्यांना शेतकऱ्यांची एकता आणि अधिकार चिरडून टाकायचे आहेत.
आम्ही सरकार आणि प्रशासनाला मागणी करतो की या प्रकरणाची निष्पक्ष आणि त्वरित उच्चस्तरीय चौकशी व्हावी, हल्लेखोरांना त्वरित अटक करावी आणि दोषींना कठोर शिक्षा दिली जावी. या घटनेच्या निषेधार्थ शेतकरी एकजूट होत आहेत. राष्ट्रीय किसानी मंच (जनआंदोलनांचा राष्ट्रीय समन्वय) आणि सर्वोदय मंडळ या हल्ल्याच्या विरोधात निवेदन करत आहे.
अशा प्रकारचे भ्याड आणि पूर्वनियोजित कृत्य आमची एकता आणि संकल्प कमजोर करू शकत नाहीत. आम्ही शेतकऱ्यांच्या हक्कांसाठी आणि सन्मानासाठी आमचा लढा शांततामय मार्गाने अधिक तीव्र करू. राष्ट्रीय किसानी मंच महाराष्ट्र साथी युवराज गटकळ राष्ट्रीय समन्वयक.
