मुंबई : महाराष्ट्र इन्स्टिट्यूशन फॉर ट्रान्सफॉर्मेशनची मित्र बैठक मुख्यमंत्री देवेंद्र फडणवीस यांच्या अध्यक्षतेखाली सह्याद्री राज्य अतिथिगृह येथे पार पडली. बैठकीस मुख्य सचिव सुजाता सौनिक,वित्त विभागाचे अतिरिक्त मुख्य सचिव ओ.पी.गुप्ता, मित्रा संस्थेचे मुख्य कार्यकारी अधिकारी प्रवीण परदेशी,वन विभागाचे प्रधान सचिव वेणुगोपाल रेड्डी,मुख्यमंत्र्यांचे सचिव श्रीकर परदेशी,वित्त विभागाच्या सचिव शैला ए.,कृषी व पर्यटन सचिव जयश्री भोज आदी उपस्थित होते.
देशातील अग्रेसर राज्य म्हणून महाराष्ट्राचा लौकिक कायम ठेवण्यासाठी वित्तीय सुधारणा,खनिकर्म,गटशेती,सौरऊर्जा प्रकल्प,जैव इंधन,आंतरराष्ट्रीय स्तरावरील रोजगार संधी अशा प्राधान्य क्षेत्रांच्या विकासाला चालना देण्यासाठी ‘मित्रा’ने
दिशादर्शक काम करावे,असे निर्देश मुख्यमंत्र्यांनी यावेळी दिले.
गटशेतीच्या माध्यमातून शेतकऱ्यांच्या सामूहिक विकासाला चालना देण्यात येत आहे. राज्यात साधारण ४०० गट कार्यरत आहेत. त्यातील बहुतांश गटांनी चांगली कामगिरी केली आहे. कृषी,जलसंधारण,फलोत्पादन,पणन आदी विभागांच्या योजनांचा एकत्रित लाभ देऊन गटशेती करणाऱ्या शेतकऱ्यांना आर्थिक-सामाजिकदृष्ट्या सक्षम करण्यात येणार आहे. या पार्श्वभूमीवर विविध योजनांच्या अभिसरणाचे एक मॉडेल तयार करण्यात यावे मुख्यमंत्री देवेंद्र फडणवीस म्हणाले.
